Hoe raad ons en ander kan beinvloed.

 Wil graag ’n paar gedagtes deel:

Baie TO moeders is nog in hulle groentjie skoene, ander so in die middel en ander veterane. Ons almal het van tyd tot tyd leiding nodig ongeag hoe ver ons in die TO is. Dit is belangrik dat ons almal net ’n oop kop hou. Dit is goed om raad te gee en voorstelle te deel. Ons moet egter net onthou wat vir een persoon werk, werk nie noodwendig vir ’n volgende persoon nie.

Ons praat baie van ons eie ding doen, in sommige gevalle is ek ook een van hulle MAAR ek moet dan nou ook by sê ek het struktuur nodig. Ek moet weet waarnatoe ons beweeg, ek moet beplan. Ek vind myself in dae wat ek verlore raak onder tonne inligting en dit is die laaste ding wat enige een van ons wil hê. Ons almal leer maar soos ons aangaan, ons maak foute, ons probeer nuwe dinge. Indien iets nie werk beweeg dan na ’n volgende ding wat wel kan werk.

Sommige ouers verkies formele kurrikulums. Ons het almal maar ons redes hoekom ons sekere goed volg en hoe ons ʼn program wil doen. Baie verkies om formeel te werk omdat hul struktuur wil hê, al die nodige materiaal byderhand hê en nie ure hoef te spandeer om vir goed rond te snuffel of nog navorsing ook te doen.

Ander verkies weer om vry te wees en hul eie ‘pakket’ saam te stel, dit volg soos hulle voel dit is reg.

Daar is geen reg of verkeerd hier nie, dus of jy nou ’n program gebruik wat R16000 kos of die internet gebruik wat amper niks kos of net al amper aandele by die biblioteek het, dit maak nie saak nie.

Ons eerste fokus hier moet wees wat God vir ons wil hê, Hy sal vir ons die regte pad wys. Dan moet ons fokus waarop dit wat werk vir ons kinders. Geen twee kinders is dieselfde nie en met tyd leer ons hoe om dit te benader en hoe hulle wil leer.

Dit is lekker om na ander se raad te luister, onthou net op die einde van die dag moet elkeen doen wat vir julle reg is en nie omdat ander so sê!

Groete

Maryna