Hou Net Op Sukkel - Youtube hulp

Ek het onlangs op 'n baie oulike Youtube kanaal afgekom Hou Net Op Sukkel.

Die kanaal is vir Graad 10 tot 12 leerlinge en het videos vir Wiskunde, Wetenskap, Chemie en Fisika.

Hierdie is een van daai moet volg kanale. Die verduidelikings is puik.Dit word aangebied op 'n manier waarvan jong mense sal hou en is nie afgewater of vervelig nie. Gaan loer gerus op Youtube na die kanaal en volg hul, daar is baie videos om van te kies. 

Kyk gerus hier na die inleidings video.

Laat weet gerus wat jul van die kanaal dink. 

Lekker leer.

Groete

Maryna

Wat is die gogga in die water?

Het jy al opgemerk hoeveel goggas en larwes daar in water is. Ken jy egter die algemene name van al daai goggas?

Hierdie kaartjies is oorspronklik saamgestel deur Ellen McHenry van die Basement Workshop en met toestemming deur my vertaal.

Die teiken ouderdom vir die aktwititeit is vanaf 8 jaar en op. Jy kan die kaartjies gebruik as 'n geheue tipe speletjie, of jy kan snap met dit speel. Alternatief kan jy die kaartjies gebruik as verwysing wat deel uitmaak van jou studie.

Indien jy die kaartjies gaan gebruik om mee te speel, stel ek voor jy druk dit op karton en lamineer dit. Dit sal die kaartjies nog baie lank laat hou. 

Laai die kaartjies HIER af.

Lekker speel en leer.

Groete

Maryna

Papier Virus Model aktiwitiet

Leer 'n bietjie van mikrobiologie deur te leer van die T2 en adenovirusse.

Die aktiwiteit is oorspronklik saamgestel deur Ellen McHenry van die Basement Workshop. Met toestemming is dit vertaal deur my.

  

Agtergrond informasie

’n Virus is reg op die lyn van lewende en nie-lewend. Alhoewel dit DNS bevat, die boustene van lewe, het ’n virus baie min in gemeen met ’n lewende sel. Dit het nie die organelle wat in lewende selle gevind word nie, soos bv. mitochondria, nukleus, endoplasmiese retikulum en ander buitenste membraan.  ’n Virus beskik nie oor geslagtelike voortplanting nie,  dit kan egter genetiese materiaal uitruil tussen selle. Dit moet homself heg aan ’n lewende sel om nog virusse te maak. ’n Sekere tipe virus kan homself slegs heg op ’n spesifieke sel. Soos bv. ’n virus wat jou longe aanval, val nie jou maag aan nie.

  Virusse het ’n baie geometriese voorkoms. Dit lyk meer soos geometriese figure as

lewende kreatiere. Die adenovirus soos hier gewys het 20 sye. Soms is daar lang skerp pennetjies wat by die hoeke uitsteek. Soek gerus op die internet rond vir nog voorbeelde.

  Die ander virus soos hier aangewys is die T2, dit heg homself slegs aan bakterieë. Jy sal nooit die een kan vang nie. Dit word ’n bakteriofaag genoem. Sy vorm is moontlik die mees interessantste van al die virusse. Soos wat lyk dit vir jou? Dalk ’n ruimtetuig? Die protein is op die boonste deel en die bene onder is wat aan bakterieë vasheg. Die bene trek die lyf af sodat dit aan die sel kan raak, en die virus DNS word in die sel in geblaas.

Doel van die aktiwiteit:
Leer 'n bietjie meer van die T2 en adenovirusse. Maak papier modelle van die twee virusse.

Ouderdomsgroep:
Ongeveer 10 tot 16 jaar.

Tyd benodig:
Ongeveer 15 tot 20 minute per model afhangende of jy dit gaan versier.

Wat jy benodig:

-Skêr

-Gom

-Patrone wat uitgedruk is in kleure van jou keuse

-‘Chenille stems’ (pypskoonmakers) in enige kleur (3 per virus)

-Skuifspelde of wasgoedpenne om die dele aanmekaar te hou terwyl dit droog word

-Enige iets ekstra wat jy wil gebruik om jou virusse mee te versier

Laai die patrone en instruksies HIER af.  

Lekker leer.

Groete

Maryna 

Menslike Wonder - Infografika

Hoendereier Ontwikkelings Wiel

Die aktiwiteit is oorspronklik saamgestel deur Ellen J McHenry van die Basement Workshop. Met toestemming het ek dit in Afrikaans vertaal. 

Doel van die aktiwiteit:
Om te leer hoe 'n hoendereier ontwikkel en wat gebeur deur die 21 dae.

Ouderdoms groep: Graad R tot Graad 4

Beskrywing van die aktiwiteit:
Soos gesien in die foto hierbo is dit 'n ontwikkelings wiel met nog 'n wiel agter om die ontwikkelings stadium aan te dui (in die oranje venster) soos die kuiken groei per dag. Wat natuurlik gedraai kan word om elke stadium te sien.

Tyd benodig:
Ongeveer 30 minute met knip en inkleur, kan minder wees indien die kinders nie sou inkleur nie.

Wat jy benodig:
Afdruk van die patroon
'n Skêr
Kleur potlode
Wit karton

Laai die patroon aktiwiteit af.

Ouer kinders kan ook die aktiwiteit gebruik in Biologie deur dit binne 'n Wetenskap Joernaal te plak as deel van hul diere studies.

Lekker leer.

Groete

Maryna


 

Verskietende ster? Dink weer...

Hoe wonderlik is hierdie wêreld van ons darem nie. Maar kyk bietjie na hierdie "verskietende ster" insetsel. Dinge is nie altyd wat ons dink dit is nie. 

Groete

Maryna

Organiese Molekule Kaartspeletjie

Die Organiese Molekule Kaartspeletjie is oorspronklik saamgestel deur Ellen McHenry van die Basement Workshop. Met toestemming het ek dit in Afrikaans vertaal.

Doel van die speletjie: 
Om die konsep te versterk van hoe atome kombineer met koolstof om organiese molekules te maak, met spesiale aandag aan hoeveel verbindings elke tipe atoom kan maak (koolstof kan vier maak, waterstof net een, ens)

Ouderdoms groep: 
9 tot 14

Beskrywing van speletjie:
Individuele kaarte is gemerk met die afkortings vir die elemente C, H. O, Cl, N, Br. Elke kaart wys ook hoeveel bindings die atoom kan maak. Spelers sit hul kaarte uit met hul speelbeurt om 'n groot organiese molekule te vorm. So probeer hul om ontslae te raak van al die kaarte in hul hand.

Tyd benodig:
Sommige speletjies is vinnig verby, in net 5-10 minute. Maar die meeste speletjies neem langer, ongeveer 20 minute. Spelers moet aangemoedig word om die speletjie 'n paar keer te speel, die uitkoms van elke spel kan anders wees (soos die molekules gevorm).

Wat jy benodig:
Afskrifte van die patroon bladsye.

Laai die speletjie HIER af. 

Hierdie speletjie kan deel uitmaak as kinders besig is om Chemie en die Periodieke Tabel te leer.

Lekker speel.

Groete

Maryna

Knutsel met Skribbel masjiene

In my vorige skrywe het ek julle bekendgestel aan die die konsep om te knutsel. Daarna het ons afgeskop met die elektriese stroombaan aktiwiteit. Vandag wys ek vir julle hoe om skribbel masjiene te maak.

Verskeie van ons skribbel masjiene

Hieronder is 'n paar video's om te wys hoe ons masjiene beweeg het.

Wat jy alles benodig:
- Bakkies of glasies (enige iets wat nie te swaar is nie)
- Baie velle papier
- Maskeer band
- Kryte of koukie penne
- 'n battery
- 'n motortjie (die tipe wat 'n mens in speelgoed aantref) (maak seker dit het 'n positiewe en negatiewe draadjie aan)
- 'n stukkie gomgeweer stafie (of iets om te gebruik as 'n gewig sodat die motor kan vibreer)
- Opsioneel: pyp skoonmakers, ogies - enige iets om kreatief mee te wees. Maak so:
- Plak die kryte of penne aan die glasie of bakkie vas met maskeer band. Jy kan enige hoeveelheid gebruik.
- Plak die battery teen jou glasie/bakkie vas.
- Sit vir jou motortjie 'n gewig aan - sny 'n stukkie van die gom stafie, maak 'n gaatjie in. Maak seker die gaatjie is nader aan die een kant as die ander kant sodat die gom nie in gelyk is aan albei kante nie. Druk die gom stafie in die lang deeltjie van die motortjie.
- Plak die motortjie aan jou glasie/bakkie vas. - Jy kan dit enige plek plaas solank dit kan vibreer, op die kante vibreer dit gewoonlik meer. Jy kan self die motortjie onder vasplak dat die glasie/bakkie daarop hop.
-Plaas die velle papier op 'n tafel, so groot as moontlik aangesien die masjiene wild rond hardloop en krap.
- Plak die negatiewe en positiewe dele aan jou battery vas en laat jou masjien hardloop.

Met die aktiwiteit moet jy die kinders vry laat ontdek. Die moontlikhede is eindeloos.

In die volgende knutsel inskrywing gaan ek vir julle wys hoe om naaldwerk stroombane te maak.

Lekker leer en speel.

Groete

Maryna

Knutsel met Elektriese stroombane

In my skooldae het ons formeel van stroombane geleer. Die juffrou het die demonstrasie gedoen en ons moes die diagramme teken en al die betekenisse skryf en leer. Klink opwindend nê! Nee nie regtig nie.

Wat as...

Wat as jy vir jou kind komponente kan saamstel wat tot die jongste peuter kan gebruik om te leer hoe elektriese stroombane werk. Sonder dat jy enige insette gee, gee jy jou kind die geleentheid om te beproef en te toets hoe 'n gloeilampie werk en ook 'n skakelaar ens.

Wat jy alles benodig:
- Houtblokkies
- Spykers (geleibaar)
- Soldeerbout
- Krokodil knippies (rooi en swart)
- Gom geweer
- Verskeie batterye 
- Battery houers
- Gloeilamp houers
- Gloeilampies (die wat jy in 'n flits gebruik)
- Gonsers (buzzers)
- Skakelaars
- Enige ander komponente - opsioneel (waaiertjies, verskeie skakelaars, motortjies, ratte wat beweeg ens)

Verskeie komponente en benodighede

Maak so:
Houtblokkies:
Sny houtblokkies groot genoeg om afsonderlike komponente daarop vas te kan sit. (Ek het afval hout stukkies gebruik.) Jy kan 'n handsaag of elektriese saag hiervoor gebruik. Skuur die kante sodat daar geen skerp dele is en om van enige splinters ontslae te raak.

Sit komponente op die blokkie:
Battery houers: Jy kan die battery houer op die houtblok vas skroef. Die enkel battery houers het slegs een gaatjie, ek het dus net een skroef gebruik. Die vier battery houers het vier gaatjies, twee-twee bymekaar, ek het slegs 2 skroewe gebruik, een aan elke kant. Alternatief kan jy die battery houer met 'n gom geweer aan die houtblok vas gom. Slaan twee spykers 'n entjie uit mekaar in die houtblok in. Ek het nuwe plafon spykers gebruik. (My eerste poging met ou gewone spykers was nie suksesvol.) Draai die oop draadjie gedeelte om die spyker en soldeer die draadjie aan die spyker vas. Maak seker daar is behoorlike konneksie teen die spyker om te verseker dat die krag daardeur kan vloei. Plaas nou gom waar die draadjie op die houtblok lê om te verseker alles bly mooi in plek. (sien foto hieronder)

Ander komponente: Alle komponente sal op die blokkie gesit word met of 'n skroef of teen die blokkie vas gegom word. Dit sal presies dan verder vasgesit word soos bo verduidelik. Neem kennis die gloeilamp houers wat ek het is wat ek in die hande kon kry, daar is ander wat slegs met 'n skroefie vas gesit kan word aan die blokkie. Indien jy van die soort het wat ons het, sit dit vas met 'n skroef en slaan die spyker teen die metaal plaat vas sodat daar 'n konneksie kan wees.

Die kind kan met die krokodil knippe die komponente met mekaar verbind. Die doel van die aktiwiteit is om NIE (die ouer) die stroombane vir die kind te bind nie. Dit is slegs jou verantwoordelikheid om alle komponente saam te stel.

Die knutsel aktiwiteite met die stroombane kan kinders van enige ouderdom doen, selfs kleintjies. Die kinders geniet dit baie. Moet nie sommer inspring en met jou eie hande wys nie, jy kan slegs met jou mond voorstelle maak. Laat hulle verskillende skakelaars probeer en ook waaiertjies aansit ens.

Neem kennis:
Gloeilampies: Maak seker wat die volt sterkte van jou gloeilampie is, moet nie meer as een battery wat 1.5V is op 'n gloeilampie sit wat ook slegs net 1.5V is nie, jy sal dit blaas. Indien jou gloeilampie 3.5V is, gebruik dan twee batterye ens.
Skakelaars: Indien jou skakelaar meer as een posisie het is dit belangrik om te onthou daar is altyd net een negatief op die skakelaar en die res is almal positief.

Ek het 'n multimeter (multitester) by my man gekry. Dit het my baie gehelp om te toets of al my komponente kontak het op die spykers. Dit is nie 'n moet item nie.

Wenk: Neem jou tyd met die aktiwiteit en ook om die komponente bymekaar te sit. Toets eers alle komponente voor jy dit vir jou kind gee om mee te werk. 

Neem dit verder: Indien jou kind vertroud is en voel hy/sy het genoeg dae met dit spandeer leer hulle hoe om stroombaan diagramme te maak. Laat hulle 'n spesifieke stroombaan bou en dit dan te teken. Verduidelik hoekom wat gebeur of hoekom nie. Leer vir hulle die simbole ens. 

'n Woord oor soldeer: Dit was my eerste keer dat ek self gesoldeer het. Dit neem geduld en oefening. Ek is tans in die proses om 'n kort Strokiesprentboek in Afrikaans te vertaal wat wys hoe om te soldeer. Ek sal dit plaas sodra ek klaar is.

Ek hoop julle geniet die aktiwiteit soveel soos wat ons dit geniet. Indien julle enige vrae het, vra gerus en deel julle ondervinding met dit.

In die volgende knutsel inskrywing gaan ek vir julle wys hoe om skribbel masjiene te maak. Dit is vet pret vir die kinders!

Groete

Maryna

Om te knutsel

Die woord knutsel mag moontlik vreemd wees vir sommiges. Meeste ken dit maar as die Engelse woord Tinker.

Nou wat presies is knutsel en hoekom is dit so belangrik?

Knutsel gee jouself en jou kinders die vryheid om te kreatief te raak, om 'n oplossing te vind vir moontlike struikelblokke, om te leer terwyl hul met hul hande werk. Hul leer om hul verstand te gebruik en toe te pas wat hul ontdek of leer het.

Kom ons neem die Disney karakter Tinkerbell vir 'n oomblik, sy Tinker, sy skep, maak iets uit niks.

Stel jul skooldae so voor: Wiskunde werkboek, taal werkboek, Wetenskap - vul hier, kyk 'n video daar, ma wys en hulle sit en gaap. Dit geld vir menigte vakke.

MAAR stel jouself nou dit voor: Jul haal 'n boks uit die kas vol verrassings. Dit is nou natuurlik as jy nie reeds 'n knutsel ruimte het nie. Binne is daar draadjies, batterye, liggies, ratte, wieletjies, waaiertjies en nog vele meer. Jou kinders se oë rek van opgewondenheid.

Hulle pas en toets en speel. Dit werk saam, dit werk nie saam nie, dit kan so beweeg en dit hop op en af. Ma antwoord net nou en dan as die kind 'n vraag vra. Baie belangrik ma help nie, ma bou nie. Ma kyk hoe haar kinders ontdek en skep.

Nie net kan knutsel gebruik word in Wetenskap nie, maar hul kan ook Wiskunde daaruit leer, of Aardrykskunde of self hul taalvermoë uitbrei en opbou. Knutsel stel hul in staat om 'n wye spektrum van dinge te leer sonder dat hul besef hul leer.

In die Ted video hieronder wys die kunstenaar CH Huang wat hy alles met sy geknutsel maak.


Dit klink en lyk opwindend!

In my volgende inskrywing gaan ek jul wys hoe om basiese elektroniese komponente saam te stel vir die kinders om mee te knutsel. Dit gaan vet pret wees.

Groete

Maryna

Klank aktiwiteite

Sien klank

Hierdie klank aktiwiteite het ons 'n paar jaar gelede gedoen.

Ek het vergeet om 'n foto van die eerste een te neem maar onder is 'n prentjie om vir jul 'n idee te gee.

Wat jy benodig:
'n Bak, plastiek, rekkie, kleefband, 'n paar ryskorrels, 'n pot en 'n houtlepel.

Foto bron: Sound - tune into sound and see the way it works by Steve Parker

Maak so:
Nes in die foto hierbo, plaas die kleef plastiek oor die opening van die bak, hou dit in plek met die kleefband en rek 'n rekkie oor die bokant van die bak. Plaas 'n paar ryskorrels bo op. Neem die pot en hou die naby die bak, slaan met die houtlepel op die pot.

Wat gebeur:
Die houtlepel wat op die pot geslaan word veroorsaak klankgolwe. Die klankgolwe laat die plastiek vibreer en die ryskorrels spring op en af.

Die eksperiment wys vir ons hoe 'n oordrom werk. Klank gaan binne die oordrom wat dan vibreer en so hoor ons die klanke om ons. 

Skiet met klank

Wat jy benodig:
'n Toilet rolletjie; plastiek, rekkie, stukkie karton, stukkie papier.

Maak so:
Knip die karton rond (net so groot soos die rolletjie se opening). Maak 'n gaatjie in die karton. Met kleefband plak die stukkie karton aan die toilet rolletjie vas. Op die ander punt, trek die plastiek oor die rolletjie vas met die rekkie soos in die foto. Plak 'n stukkie papier op 'n tafel oppervlak vas. Maak seker 'n langer strook staan regop soos in die foto. Hou die rolletjie taamlik naby die papiertjie en skiet die plastiek deel van die rolletjie met jou vinger.

Wat gebeur:
Die klankgolwe kompak en beweeg deur die rolletjie en uit by die gaatjie in die karton. Die golwe slaan teen die papiertjie vas en veroorsaak dat die papiertjie agtertoe buig.

Alternatief: In plaas daarvan om 'n papiertjie te gebruik, kan jul 'n kers gebruik wat aangesteek is. Die klankgolwe sal die kers dood blaas.

Hoor klank

Wat jy benodig:
'n Dun plastiek pyp, 'n tregter en kleefband.

Maak so:

Maak 'n stetoskoop

Plaas die tregter binne in die pyp se opening en plak dit stewig vas met kleefband. Maak seker dat geen lug ontsnap nie. Ons het dit oorspronklik met die pyp soos in die foto gedoen, maar met 'n volgende keer 'n langer en dunner pypie gebruik wat beter gewerk het.

Wat gebeur:
Wanneer jy die tregter op die kind se bors plaas kan die hartklop duidelik gehoor word, nes 'n dokter na ons harte luister. Die klankgolwe van die hartklop versamel in die tregter en beweeg in die pyp af na die oor. 

Luidspreker

Wat jy benodig:
'n Groot vel karton en kleefband.

Maak so:
Rol die karton soos in die foto en plak dit vas met kleefband sodat dit nie uitrol nie.

Luidspreker

Wat gebeur:
Die 'horing' neem al die klank op en voor dit vrygestel word, versterk die klank vorentoe wanneer daardeur gepraat word. Wanneer jy daarin luister gaar al die klank in die oop kant en beweeg vorentoe na jou oor.
 
Stembande vibreer en vorm klanke wanneer die lug uit jou longe gestoot word.

Lekker leer.

Groete

Maryna

Vingerafdrukke

Ons het 'n paar jaar gelede die aktiwiteit in ons studie oor sintuie.

Hierdie is egter 'n onderwerp wat ons weer gaan behandel maar bietjie dieper in die onderwerp in delf.

Daar is geen mense wat dieselfde is in die hele wêreld nie, nie eens 'n identiese tweeling nie. Net soos ons DNA verskil, so verskil on vingerafdrukke ook. Dit is wat jou 'n identiteit gee. Polisie gebruik vingerafdrukke om te bepaal of iemand 'n verdagte is. 

Hier onder is 'n aktiwiteit om die kinders se vingerafdrukke te neem.

Wat om te doen:
1. Neem 'n gewone grys potlood en krap dit op 'n stuk papier.
2. Plaas jou kind se vinger op die gekrapte merke.

3. Gebruik dan bree kleefband of kontak plastiek en plaas dit op jou kind se gesmeerde vinger, druk op die kleefband en trek dit af.
4. Sit nou die kleefband op 'n papier en siedaar, vingerafdrukke.

Leers hier op Mieliestronk meer van vingerafdrukke.
 
Nog 'n aktiwiteit, vingerafdruk mannetjies.

Ons het die boek gebruik Great Thumbrpint Drawing Book deur Ed Emberley's wat ons by die biblioteek gevind het. Daar is verskeie drukke van die boek.

Meer oor ons vel

Die ongelooflikse feit van vel is dat dit die grootste orgaan van die menslike liggaam is. Dit weeg ongeveer 15% van jou massa.  Wanneer jou warm kry, sweet jy, die sweet verdamp en verkoel jou liggaam.

Dit is belangrik wanneer ons kinders oor vel leer, dat ons ook vir hul leer hoe om dit te versorg, dit sluit sonskerm en vele meer in.

Lekker leer.

Groete

Maryna

Sirkulasie Speletjie - Menslike Liggaam

Hierdie Sirkulasie Speletjie is oorspronklik saamgestel deur Ellen McHenry van The Basement Workshop en is in Afrikaans vertaal deur my met haar toestemming.

Foto van speletjie soos op Ellen se webblad

Ouderdoms groep: 8 tot 14 jaar

Doel van die speletjie: Om te leer of te hersien - sirkulasie in die liggaam. Basiese wetenskaplike konsepte wat gedek word is die beweging van suurstof na selle en koolstofdioksied na die long deur die rooibloedselle. Produksie van rooibloedselle in die been en suiker en proteine na selle te neem deur die bloedstroom. Ook die lewering van afval na die niere sodat jou liggaam daarvan onslae kan raak. Die hart is die hoofmasjien wat jou bloed aan die beweeg hou. Die 'kaart' van die sirkulasie sisteem in en uit jou longe, hart en ander liggaamsdele.

Beskrywing: Hierdie is 'n twee span speletjie waar 2 tot 6 spelers kan saamspeel. Die spelers draai die hart 'spinner' om te sien hoeveel 'hartkloppe' hulle kry vir daai beurt. Elke speler moet dan of 'n bloedsel, voedsel of afval merker beweeg na die eindpunt - of selle na die longe of die niere. Suurstof en koolstofdioksied ry bo op die rooibloedselle. Voedsel en afval dele beweeg sonder die hulp van rooibloedselle. Die eerste span wat al hulle suurstof en voedsel aflewer en die afval en koolstofdioksied van ontslae raak, wen die spel.

Tyd benodig: Die saamstel van die speletjie sal voor die tyd moet plaasvind. Die tyd hieraan verbonde hang af van hoeveel ingekleur word. Knip en gom tyd neem minder as 30 minute. Werk eers aan die merkers en ‘spinner’ om tyd te gee vir alles om droog te word terwyl jy die bord saamstel. Laat ongeveer 45 minute toe vir die speletjie om gespeel te word.

Wat jy benodig:  afdruk van die patroon bladsye gedruk op karton,  kleefband, skêr, gom en gekleurde potlode. 

Jy kan die speletjie hier aflaai.

Ander liggaam aktiwiteite wat julle kan doen:
Liggaam Bingo
Maak 'n been
Anatomie T-hemp 

*Indien jul dit met iemand wil deel verwys hul terug na die blad om dit hier af te laai - dankie.*  

Hou die spasie dop vir nog lekker aktiwiteite.

Lekker speel en leer.

Groete

Maryna

Menslike Liggaam - Bingo

Hierdie menslike liggaam Bingo is oorspronklik saamgestel deur Ellen McHenry van The Basement Workshop en is in Afrikaans vertaal deur my met haar toestemming.

  Ourderdoms groep: 8 tot 13 jaar.

Doel van die aktiwiteit: Om basiese informasie van interne organe te hersien.

Beskrywing van aktiwiteit: Word gespeel soos gewone Bingo, behalwe dat daar drie vlakke van vrae is. Vlak 2 en 3 is geskik vir 'n ouer kind, of 'n kind wat reeds die nodige kennis dra. 'n Voorbeeld vraag uit Vlak 3: "Die hipofise klier word in die orgaan aangetref."

Tyd benodig: 30 - 40 minute

Wat jy benodig: Afskrifte van die Bingo bord, afskrifte van die liggaamsdeel kaarte vir elke kind, gom, skêr, merkers om op die dele te plaas of alternatief merk penne/kryte. Afskrifte van die vrae vir die ouer.

Laai die Liggaam Bingo hier af. 

Hoe ons dit doen: Ek het die bladsye gelamineer. Die kinders het die kaartjies wat hul gekies het met wondergom op die Bingo bord gesit. Ek het vir hulle die vraag gelees en dan het hul die antwoord prentjie op die Bingo bord gesoek.Hul het hul keuse met 'n witbordpen gemerk. Ons het dan gekyk of die antwoorde reg is. As dit was hou hulle die kruisie wat hul met die witbordpen daarop gemaak het. As dit nie reg was, moet hul die fout uitvee, maar hul mag dan nie die regte een kies nie. As iemand 'n Bingo gehad het, het hul alles uitgevee en ons het aangegaan met die vrae sodat daar weer 'n kans op 'n nuwe wen kan wees.


Nog ander menslike liggaam aktiwiteite wat jul kan doen:
Maak 'n been
Anatomie T-hemp

*Indien jul dit met iemand wil deel verwys hul terug na die blad om dit hier af te laai - dankie.*

In die komende maande gaan ek nog aktiwiteite met julle deel. Hou dus die spasie dop. Lekker leer!

Groete

Maryna

Boek loer: Waar kom babas vandaan?

Ek is seker dat meeste ouers slaan behoorlik in sweet uit as dit by die onderwerp van babas en seks kom. Hoe vertel jy vir jou kind sonder om jou kind te laat kopkrap of jouself so opwerk dat jy skaars kan asemhaal.Dan praat ons nie eens van bloos van oor tot oor nie.

Ek het hierdie oulike boek Kom ons praat oor waar babas vandaan kom deur Robbie H. Harris lank gelede by Bargain Books raak geloop.

Kom ons praat oor waar babas vandaan kom

Ek gaan nie jok nie, ek het dit baie lank uitgestel en het werklik baie opgesien na hierdie onderwerp. Die boek is baie oulik, maar hierdie ma was net nie reg vir dit nie. Ek meen ek wil mos hê my kinders moet in 'n mate onkundig en onskuldig bly. Ongelukkig is die realiteit dat hulle groot word en ons moet dit aanvaar.

Ek het onlangs die onderwerp aangedurf. Ek het self die boek vir die kinders gelees en dit het baie goed verloop. Hulle het alles verstaan en wou net meer weet. Dit was toe glad nie so erg as wat ek gedink het nie. Niks sweet op my voorkop en geen rooi gesigte.

Hier onder is 'n kykie na die inhoudsopgawe.

Inhoudsopgawe

Inhoudsopgawe

Die boek is in 'n mate soos 'n strokiesprent maar ook nie heeltemal. Die prentjies is oulik geillustreer. Die karakters is 'n voëljie wat alles wil weet en 'n bytjie wat niks wil weet. Die voëltjie is glad nie skaam en die bytjie wil net heeltyd weghardloop.

Daar word eenvoudig vir die kinders verduidelik wat alles is, hoe alles werk, die wat en die hoekom en waarom. Dit is smaakvol verduidelik. Die boek verduidelik ook mooi dat seks vir grootmense is wat getroud en lief is vir mekaar. 

Die eier se ongelooflike rit

 Ek het nog nooit enige ander sulke tipe boeke onder oë gehad nie, kan dus nie vergelyk nie. Maar ek glo as daar nou werklik een boek is wat ek vir enige iemand kan aanbeveel is dit die een. As jy vir jou kinders die blomme en bye moet vertel KRY DIE BOEK!

Die boek is geskik vir kinders tussen 8 en 12 jaar. Maar ek sal voorstel wag tot jou kind werklik emosioneel en verstandelik reg is vir die onderwerp. Eerder van so 10 of 11 jaar. (is net my opinie)

Voorspoed en laat weet hoe dit gegaan het.

Groete

Maryna